HEIN SÉ?

HEIN SÉ?

Ahi-Oan Varanda Lakan Halo Naroman Ba Fatin Ne’ebé Nia Tuur Bá, Hodi Tuur Hakmatek Iha Baki Uma Oin, Nia Husik Ninia Ain-Rua Tuun Tabele Hanesan Mós Nia Laran Ne’ebé Sei Tabele Hela Ba Buat Ruma.
Teki-Teki Lian Ida Mosu Husi Uma-Laran,
“O Telefona Tia Ona Ga Sedauk?”
“Hau Labele!” Ho Suut Makas Nia Hatan.
Fulan Tomak, Fitun-Libur Ho Ahi Varanda Ne’ebé Naroman Loos Ba Matan Seluk, Sedauk Bele Haroman Nia Laran, Bá Dala Rihun Ona Nia Hateke Ba Telefone Alkatel Ne’ebé Nia Kaer, Ba Dala Rihun Mós Nia Hateke Ba Lalehan Hodi Koko Atu Hapara Bee-Musan Ne’ebé Atu Luun Hodi Habokon Nia Hasan.
“Lin, Hau Lahatene Loos Atu Hatete Saida?”
Linda Nudar Belun Di’ak Ida Mak Nia Koñese Derante Tinan 20 Tia Ona, Husi Halimar Rai-Rahun, Halimar Berlindus, Haksoit Borraxa Nomos Na’ok Pai Jé Ninia Manu. Maski Linda Moris Nudar “Feto” Ida Maibé Sexu La Limita Nia Hodi Pasa Tempu Ho Kriatura Ne’ebé Ema Bolu “Mane”.
“ Hahaha… O Atu Hatete De’it Mós Arasaka Ida Hanesan Ne’ené...!”
“Lin, Fasil Loos, Kada Letra Musan Ida Sai Hodi Forma Frase Se Fó Liman Ba Hanoin, Maibé Hau Lahatene Loos Oinsá Atu Uza Fuan Hodi Hatete Loos Ba Nia”
Hodi Tuur Fó Kotuk Nafatin Ba Odamatan, Liafuan Sira Ne’e Mosu No Lakon Ho Lia-Anin, Katik No Be’o Ba Didin Lolon Adamatan Uma Nian.
“ Eipa, Mimadu Demais Liu…Hehehe”
Hodi Ka’er Kafé Manas Kopu Ida, Nia Hakat Sai Husi Odamatan Hafoin Hapara Ain Neineik, Linda Halakan Ninia Sigarru, Kadeira-Rota Hein Hela Nia Iha Varanda Sikun. Hodi Hakotuk Ba Nia Belun Ne’ebé Tu’ur Muro’on Hela Iha Baki Leten, Linda Mós Komesa Tuur Daudauk.
“O Fó Hatene Para Nia Hatene Ga...!”
Linda Haroo Kafé Manas Ne’e Neineik Ba Nia Ibun, Haklalin Ho Sigarru Suar Ne’ebé Suli Hanesen Komboiu Naksuar, Hafoin Hatuur Ba Rai-Simentu. Nia Hamri’ik No Hakat Ba Uma-Laran Hodi Husik Nia Belun Ne’e Mesak Ho Anin Kalan.
Nia Hakarak Loron Ne’e Leno Nafatin Mundu Seluk Atu Kalan Ne’e Labele Lakon, Fitun Ho Fulan Hakmatek Nafatin Iha Nia Fatin. Nia Hakarak Tuur No Tuur Nafatin Hodi Hateke Oras Iha Telepone Para Labele La’o, Hakarak Hateke Nafatin Ba Leten Hodi Hapara Bee-Musan Ne’ebé Atu Habokon Ninia Hasan, Ida Ne’e Mak Hakarak Ida Husi Nia Hakarak.
“ Sei Aat Liu Tan, Se Nia Hatene Husi Ema Seluk”
Liafuan Sira Ne’e Hahoris Husi Uma Laran No Hakat Sai Husi Odamatan Hodi Hatilun Ba Nia Tilun. Nia Komesa Laran-Naruk Sé Liafuan Sira Ne’e Hatilun Ba Ema Tilun No Sei To’o Ba Nia Tilun. Maski Nia La Hatudu Jeitu Laletak Ba Linda Nia Liafuan Ne’ebé Mosu Husi Uma Laran, Maibé Liafuan Sira Ne’e Bele Sai Perigu Ba Nia.
Hodi Hateke Mamuk Ba Oin No Kokok Nia Hatan
“Hau Laran Todan Loos Atu Hatete”
“Sim, Todan Duni Tanba O La Hatete Bá!”
“Hau Ho Nia Para Tia Ona, Hatete Ba Nia Halo Saida!”
“Hahaha…Imi Na’in-Rua Bosok An Hotu.”
“Bosok,”
Liafuan Bosok Ne’e Sai Naseluk Neineik Husi Nia Ibun Tutun Rasik, Hodi Temi, “Bosok...” Halo Ema Ida Larona. Maibé, Liafuan Bosok Ne’e Lori Nia Ba Fatin No Tempu Barak. Tempu Nakukun Nia Hakarak Naroman Lalais. Nia Hakarak Okupadu Ho Nia An Atu Oras Telefone Ne’e Nakdulas Lalais, Nia Lakohi Tan Hatabele Ninia Ain Iha Fatin Ida Ne’e, Nia Hakarak Bolu Fulan Ho Fitun Atu Hamaluk Nia Hodi Husik Naroman Fó Roman Ba Nia Laran.
Iha Minutu Seluk, Kalan Hakmatek Ne’e Nakfera Ho Oras Iha Didin Lolon Ninia Lian, Hodi Hatudu Ba Tuku 23.00 Oras Timor Leste, La Iha Tan Barrullu Husi Motór Ho Kareta Ninia Lian, Anin-Hirin Kalan La Muda Ninia Tuur Fatin, Nia Nafatin Tuur Hodi Hateke Tuun Ba Telefone Ne’ebé Nia Kaer Hela, La Iha Lian Ida Tan Mak Nia Rona Husi Uma Laran, Hodi Dada Iis Neineik Nia Hateke Fila Fali Ba Oin, Maski La Iha Buat Furak Ida Iha Ninia Oin. Hodi Hanoin Mamuk Nia Hateke Tan Ba Leten.
Ritmu John Lenon Ninia Lain Komesa Sai Husi Ventilasaun Uma Ninian, Afinál Linda Taka Tia Ona Odamatan Uma Nian, Maski Ohin Odamatan Ne’e Lian Maibe Todan Ne’e Forte Liu Hodi Taka Metin Ninia Tilun Halo Nia La Sente Katak Ohin Iha Lian Balun Husi Odamatan. Dadolik Melankóliku Ne’e Halo Nia Nabeen Liu Tan Ho Moras No Todan Ne’ebé Ema Seluk Labele Sente. Asu Sira Komesa Hatenu Ba Asu Seluk Hodi Fo Sinál Ba Nia Na’in, Asu Sira Ne’e Hatenu… Hatenu No Hatenu. Teki Ne’ebé Belit Hela Iha Didin-Lolon Fó Lian Ba Dala Rua…Lian Ba Dala Tolu No Lian Ba Dala Haat. Dadolin Mós Dadolik…Dadolik Mós Dadolin…Fulan Ho Fitun Sai Subiska…Subiska No Subiska, Nakukun Sira Sai Naroman No Naroman Sira Sai Nakukun.…Oras Didin Lolon Ne’e Nakdulas Maka’as Hodi Hatudu Ba Númeru 25.00 Oras Timor Leste. Motór Ho Karreta Halai Nadodon Hodi Hakonu Dalan Kuakuak. Lian Múzika Ho Kór Ketak-Ketak Ne’e Lori Nia Ba Tempu Uluk, Nia Hakarak Uluk Ne’e Mai Fila Fali Ho Saudades Husi Nostaljia-Nostaljia Mihis Ne’ebé Sei Nelit Iha Memoria Hodi Hakanek Pulsu Fuan Nian. Dalaruma Mós, Nostaljia- Nostaljia Ne’e Lori Nia Ba Tempu Hamnasa, Kontente Hodi Husik Sira Ninia Matan Hateke Malu. Dalaruma Mós…Dalaruma Mós…Hela Deit Dalaruma.
John Lenon Ninia Lain Lakon Tia Ona No Odamatan Tarutu Fila Fali, Linda Hakat Sai Pasu Tolu No Ba Hamrik Iha Nia Belun Nia Liman Kuana, Sira Nia Matan Hateke Ba Fulan Naroman Ne’ebé Tabele Hela Iha Lalehan.
“O Nia Jeitu Ne’e Nunka Troka, Dezde Ita Ki’ik To’o Ohin-Loron...Sentimentál…Sentimentál No Sentmentál, Hau Feto Deit Mós Sei Diak…Hehehe”
“Konforme O Atu Hatete Saida Deit.”
Liafuan Sira Ne’e Sai No Suli Hanesan Bee-Hisik Ne’ebé Habokon Fatin Hotu-Hotu, Liafuan Sira Ne’e Seidauk Bele Hamamar Sira Ninia Laran Atu Haklorek Sai, Matan Haat Ne’e Sei Nafatin Apresia Fulan Ne’ebé Dook Tebtebes.